NCP Ministers: कॅबिनेट मंत्र्यांना बंगले वाटप;निवास्थानाच्या वाटपावरून राष्ट्रवादीच्या मंत्र्यांमध्ये मतभेद

• छगन भुजबळ

छगन भुजबळ हे राष्ट्रवादीचे महत्त्वाचे मंत्री राहिलेले आहेत. त्यांनी उपमुख्यमंत्री पदापासून ते अनेक मंत्री पदे भुषवलेली आहेत. महाविकास आघाडी सरकारच्या काळात त्यांच्याकडे रामटेक हा मलबार हिल येथील बंगला निवासस्थान म्हणून होतं. आता युती सरकारच्या काळात मात्र मंत्रालय समोरचा सिद्धगड हे निवासस्थान देण्यात आलेले आहे. महाविकास आघाडीच्या काळात सिद्धगड हे निवासस्थान यशोमती ठाकूर यांना देण्यात आले होते.

• दिलीप वळसे-पाटील

दिलीप वळसे पाटलांनी गेल्या अनेक वर्षात अतिशय महत्त्वाची खाती सांभाळली आहेत. विधानसभा अध्यक्ष म्हणूनही कार्यकाळ पाहिलेला आहे. महाविकास आघाडी सरकारच्या काळात गृहमंत्री म्हणून त्यांच्याकडे जबाबदारी होती. त्यावेळी त्यांना शिवगिरी हा मलबार हिलचा बंगला निवासस्थान म्हणून देण्यात आला होता. आता मात्र मंत्रालयाच्या समोर सुवर्णगड हे निवासस्थान देण्यात आलं आहे. महाविकास आघाडी सरकारच्या काळात गुलाबराव पाटील यांना हा बंगला देण्यात आल होता. याआधी अनेक राज्यमंत्र्यांना हे निवासस्थान देण्यात आलं होतं.

• धनंजय मुंडे

विधान परिषदेचे विरोधी पक्षनेते आणि महाविकास आघाडी सरकारच्या काळात सामाजिक न्याय विभागाची जबाबदारी त्यांनी सांभाळलेली आहे. या सरकारमध्ये त्यांना मंत्रालय समोरील प्रचितगड निवासस्थान देण्यात आलं आहे. महाविकास आघाडी सरकारच्या काळात हे निवासस्थान बाळासाहेब पाटील यांना देण्यात आलेलं होतं. त्याच्या आधी अनेक राज्यमंत्र्यांनी हे निवासस्थान देण्यात आले होते.

• हसन मुश्रीफ

हसन मुश्रीफ यांनी महत्वाची खाती सांभाळलेली आहेत. महाविकास आघाडी सरकारच्या काळात ग्रामविकास खातं सांभाळलं आहे. या सरकारच्या काळात ‘विशालगड’ हे निवासस्थान देण्यात आलेले आहे. हे निवासस्थान याआधी राज्यमंत्र्यांना देण्यात आले होते.

• अनिल पाटील

अनिल पाटील यांनी सुद्धा कॅबिनेट मंत्री पदाची शपथ घेतलेली आहे. मात्र,  त्यांनाही सुरुची इमारतीमध्ये सदनिका निवासस्थान म्हणून देण्यात आलेले आहे. ‘सुरुची’ मध्ये मुख्यत: राज्यमंत्री यांना निवासस्थान दिले जाते.

• धर्मरावबाबा आत्राम

याआधी मंत्री म्हणून त्यांनी काम पाहिलेले आहे. या सरकारच्या काळात कॅबिनेट मंत्री देण्यात आले आहे. मात्र, कॅबिनेट मंत्री असतानाही सुरुची या इमारतीमध्ये त्यांना निवासस्थान म्हणून सदनिका देण्यात आलेली आहे.

• संजय बनसोडे

संजय बनसोडे महाविकास आघाडी सरकारच्या काळात अनेक महत्त्वाच्या खात्यांचे राज्यमंत्री होते. या सरकारमध्ये कॅबिनेट मंत्री म्हणून त्यांनी शपथ घेतली आहे. मात्र, राज्यमंत्री असताना सुरुची इमारतीमध्ये निवासस्थान दिले होते आताही तेच कायम केले आहे.

दरम्यान, उपमुख्यमंत्री अजित पवार याला अपवाद आहेत. महाविकास आघाडी सरकारच्या काळात उपमुख्यमंत्री म्हणून देवगिरी निवासस्थान होतं. विरोधी पक्ष नेते असतानाही आणि आता पुन्हा उपमुख्यमंत्री झाल्यानंतर देवगिरी निवासस्थान कायम केलेले आहे. शिंदे-फडणवीस सरकारमध्ये वरिष्ठ मंत्र्यांची यादी पाहिली तर छगन भुजबळ हे चौथ्या क्रमांकावरती आहेत. दिलीप वळसे पाटील हे सातव्या  क्रमांकावर आहेत. हसन मुश्रीफ नव्या क्रमांका वरती आहेत. तर  धनंजय मुंडे हे विसाव्या क्रमांकावरती आहेत. मात्र,  निवासस्थाने पहिली तर राज्यमंत्री किंवा कमी दर्जाच्या मंत्र्यांची दिलेली आहेत. त्यामुळे युती सरकारमधील  मतभेद पाहायला मिळत आहे.